کمبوڈیا کی آمر حکومت ریڈ خمیر کے رہنماؤں کو سزائیں، امریکا خیرمقدم

دنیا میں وسیع پیمانے پر ظلم روا رکھنے والے حکمرانوں کا انجام یہی ہو گا،ترجمان محکمہ خارجہ کا بیان 

واشنگٹن:18؍نومبر2018(فکروخبر/ذرائع)امریکا نے کمبوڈیا کی ایک خصوصی عدالت کی جانب سے آمریت پسند حکومت ریڈ خمیر کے دو رہنماؤں کو دی جانے والی سزاؤں کا خیرمقدم کرتے ہوئے کہاہے کہ دنیا میں وسیع پیمانے پر ظلم روا رکھنے والے حکمرانوں کا انجام یہی ہو گا۔ غیرملکی خبررساں ادار کے مطابق ایک بیان میں امریکی وزارت خارجہ کی خاتون ترجمان نے یہ بھی کہا کہ ظلم و جبر میں شریک اعلیٰ حکومتی اہلکاروں کو بھی انجام کار اپنے جرائم کا جواب دینا ہو گا۔ کمبوڈیائی خصوصی عدالت نے ریڈ خمیر دورِ حکومت کے دو اعلیٰ ترین رہنماؤں کو نسل کشی کا مرتکب قرار دے کر عمر قید کی سزا سولہ نومبر کو سنائی۔ ان سابق رہنماؤں میں ستاسی سالہ کھیْو سامفان اور بانوے برس کے نوان چیا ہیں۔