ایران نے ملکی ساختہ جیٹ طیاروں کی پروڈکشن میں اضافہ کر دیا

جلد ہی یہ جنگی طیارے ایرانی فضائی فوج کے کنٹرول میں دے دیے جائیں گے،ایرانی وزیردفاع

تہران:03؍نومبر2018(فکروخبر/ذرائع)ایران کے سرکاری میڈیا نے بتایا ہے کہ ملکی ساختہ جیٹ طیاروں کی پروڈکشن میں غیرمعمولی اضافہ کر دیا گیا ہے۔ ایرانی ٹیلی وڑن نے ایرانی ساختہ جیٹ طیارے کوثر کی وسیع پیمانے پر پروڈکشن کی وجہ بیان نہیں کی ہے۔ غیرملکی خبررساں ادارے کے مطابق ایرانی وزیر دفاع بریگیڈیئر جنرل امیر حاتمی نے کہاکہ جلد ہی یہ جنگی طیارے ایرانی فضائی فوج کے کنٹرول میں دے دیے جائیں گے۔ امیر حاتمی نے ہی کوثر نامی جیٹ طیارے کی پروڈکشن کے پراجیکٹ کا افتتاح کیا ہے۔ ایرانی فوج میں جنگی طیاروں کا اضافہ ایسے وقت میں کرنے کا فیصلہ کیا گیا جب امریکا کی ایرانی خام تیل کی ایکسپورٹ پر پابندی پانچ نومبر سے عائد ہونے والی ہے۔