شام میں اتحادی فوج کے حملوں میں 3300 عام شہری جاں بحق

23 ستمبر 2014ء سے 2018ء کے آخر تک مشتبہ داعشی جنگجوؤں کے خلاف 29 ہزار 920 حملے کیے گئے،رپورٹ 

بیروت:24؍ستمبر2018(فکروخبر/ذرائع)شدت پسند گروپ داعش کے خلاف امریکا کی قیادت میں قائم اتحاد نے اعتراف کیا ہے کہ 2014ء کے بعد شام میں بمباری کے دوران 3300 عام شہری بھی مارے گئے۔غیرملکی خبررساں ادارے کے مطابق انسانی حقوق کی صورت حال پر نظر رکھنے والے ادارے آبزرویٹری نے ایک بیان میں کہاکہ امریکا کی قیادت میں قائم عالمی فوجی اتحاد کی طرف سے جاری کردہ رپورٹ میں بتایا گیا23 ستمبر 2014ء سے 2018ء کے آخر تک مشتبہ داعشی جنگجوؤں کے خلاف 29 ہزار 920 حملے کیے گئے۔ ان حملوں میں3331 شہری جن میں826 بچے شامل ہیں مارے گئے۔ قبل ازیں اگست میں جاری کردہ ایک رپورٹ میں عام شہریوں کی ہلاکتوں کی تعداد 1061 بتائی گئی تھی۔بیان میں مزید کہا گیا ہے کہ جولائی تک سولین کی ہلاکتوں کی 18 درخواستوں کی تحقیقات کی گئیں جب کہ 15 کو مسترد کردیا گیا۔ جولائی کے آخر تک سولین کی ہلاکتوں سے متعلق سامنے آنے والی 216 شکایات پر تحقیقات کی جا رہی ہیں۔