English   /   Kannada   /   Nawayathi

سعودی عرب سے سفارتی تنازعہ، کینیڈا نے مغربی ممالک سے مدد مانگ لی 

share with us

کینیڈین وزیر خارجہ نے دو اہم یورپی ممالک کے ہم منصبوں سے بات چیت کی ہے،اعلیٰ حکام کی تصدیق


اوٹاوا:11؍اگست2018(فکروخبر/ذرائع)کینیڈا کی حکومت سعودی عرب کے ساتھ شدید ہو چکے تنازعے کے حل کے لیے خاموشی سے اپنے لیے جرمنی اور سویڈن جیسے اتحادی ممالک کی مدد حاصل کرنے کی کوششوں میں ہے۔میڈیارپورٹس کے مطابق ان کاوشوں کی کینیڈین حکومت کے ذرائع نے تصدیق کر دی ۔ایک اعلیٰ حکومتی اہلکار نے اس تنازعے کی سفارتی حساسیت کے پیش اپنی شناخت ظاہر نہ کرنے کی شرط پر بتایا کہ کینیڈین وزیر خارجہ کرسٹیا فری لینڈ اس تنازعے کے حل کے لیے کم از کم دو اہم یورپی ممالک کے اپنے ہم منصب وزراء کے ساتھ بات چیت کر چکی ہیں۔کینیڈا کی حکومت نے سعودی عرب کے ساتھ اپنے موجودہ سفارتی تنازعے میں اب جرمنی اور سویڈن سے جو رابطے کیے ہیں، ان کی ایک خاص وجہ ہے، اور وہ یہ کہ ماضی میں سعودی عرب میں انسانی حقوق کی پامالی کے خلاف خلاف آواز اٹھانے پر ریاض حکومت ان دونوں ممالک کو بھی ٹارگٹ بنا چکی ہے۔کینیڈا اور سعودی عرب کے مابین موجودہ تنازعہ اس وقت شروع ہوا تھا، جب کینیڈین خاتون وزیر خارجہ کرسٹیا فری لینڈ نے ٹوئٹر پر اپنے ایک حالیہ پیغام میں مطالبہ کیا تھا کہ ریاض حکومت کو حقوق انسانی اور حقوق نسواں کے لیے کام کرنے والی ان سرکردہ کارکنوں کو رہا کر دینا چاہیے، جنہیں حال ہی میں اس قدامت عرب ملسم بادشاہت میں گرفتارکر لیا گیا تھا۔کینیڈا نے سعودی عرب کے ساتھ اس تنازعے میں اب جرمنی اور سویڈن سے رابطے اس لیے بھی کیے ہیں کہ یہ سمجھا جا سکے کہ برلن اور سٹاک ہوم میں ملکی حکومتوں نے ریاض کے ساتھ اپنے اپنے اختلافات کس طرح ختم کیے تھے۔اسی دوران خواتین کے حقوق کے لیے سرگرم کئی تنظیموں، فلاحی اداروں اور شہری حقوق کے لیے فعال متعدد گروپوں نے بین الاقوامی برادری سے مطالبہ کیا کہ وہ بھی کینیڈا کی حمایت میں اپنی آواز بلند کریں تاکہ سعودی عرب کو اپنے ہاں خواتین اور ان کے حقوق کے احترام پر مجبور کیا جا سکے۔ کینیڈا کی حکومت اس تنازعے میں مشوروں کے لیے سعودی عرب کے ساتھ مضبوط روابط کے حامل یورپی ملک برطانیہ اور خلیج کی ایک اہم ریاست متحدہ عرب امارات سے بھی رابطوں کی کوششوں میں ہے۔

Prayer Timings

Fajr فجر
Dhuhr الظهر
Asr عصر
Maghrib مغرب
Isha عشا