نیرو مودی پر شکنجہ کسنے کے لیے ای ڈی کی ٹیم سنگاپور پہنچ گئی

نئی دہلی:16؍جولائی2018(فکروخبر/ذرائع)بھارت کے متعدد بینکوں کو 13،500 کروڑ روپے کا چونا لگا کر بیرون ملک عافیت سے رہ رہے نیرو مودی پر اب شکنجہ کسنے کے لئے انفورسمنٹ ڈائریکٹوریٹ (ای ڈی) کی تین رکنی ٹیم سنگاپور پہنچ گئی ہے۔ای ڈی کے ایک اعلی افسر نے آئی اے این ایس کو بتایا "ہماری ایک ٹیم نیرو  مودی کے خلاف کیس تیار کرنے کے لئے سنگاپور پہنچ گئی ہے۔ای ڈی کے حکام اس سلسلے میں سنگاپور کے حکام سے ملاقات بھی کریں گے۔قومی تحقیقاتی ایجنسی (سی بی آئی) نے اس سال نیرو مودی کے خلاف تین مقدمات درج کیے تھے، جس کے تحت ای ڈی سنگاپور پہنچی ہے۔
ای ڈی نے بدھ کے روز ممبئی کی ایک خصوصی عدالت سے نیرو مودی اور ان کے چچا میہل چوکسی کے خلاف ناقابل ضمانت وارنٹ گرفتاری جاری کروایا تھا جس کی تعمیل کے لیے ای ڈی نے کاورائی شروع کردی ہے۔ دھوکہ دہی اور ملک کی معیشیت کو نقصان پہنچانے کے الزام میں دونوں (مودی، چوکسی) کے خلاف کئی طرح کے مقدمات درج ہیں۔ بتا دیں کہ انٹر پول نے بھی 2 جولائی کو نیرو مودی کے خلاف ریڈ کارنر نوٹس جاری کردیا ہے۔